De qələ pəsı bəbe, ha hoştə,
Ruy kəno kəsı bəbe, ha hoştə.
Saxtədıl məbi anə, ha hoştə,
Tısən bəd həsı bəbe, ha hoştə.
*****
Nə ofot ekışt bomı, ha hoştə,
Nə bəxti pekışt bomı, ha hoştə.
Mıni bətı ədənin, ha hoştə,
Iştəni məkışt bomı, ha hoştə.
*****
Bandi edim çəkerəy, ha hoştə,
Kujkaq rəməy, zəj pərəy, ha hoştə.
Hiç kinə bəqəm nəkəy, ha hoştə,
Bıyəm dılı çoko səy?, ha hoştə.
*****
Con məsəy, conən bıvot, ha hoştə,
Şin məsəy, şinən bıvot, ha hoştə.
Bəştə qəvi ov məqət, ha hoştə,
Mı vote, tınən bıvot!, ha hoştə.
*****
Ro qarde bə Qırdəni, ha hoştə,
Pulım dıjdəy, hırdə ni, ha hoştə.
Çoj mutə səva ə zoə, ha hoştə,
Votedəni, sırdəni?, ha hoştə.
*****
Ruj ənıvışt Leleye, ha hoştə,
Dastoş ğələm tıleye, ha hoştə.
Ço kədə səm dəpuşyə, ha hoştə,
(çımı fiki oməqət, ha hoştə )
Yar mıni bə hileye, ha hoştə.
*****
Vılon oka, bən reçin, ha hoştə,
Zardən reçin, sıən reçin, ha hoştə.
Kinon həməy ğəşənqin, ha hoştə.
Çəmə hoştəy ən reçin, ha hoştə.
*****
Ovçi rost be bə qıyə, ha hoştə,
Zəjon sığdə kay xıyə, ha hoştə.
Çamem bəştı sə, mıni, ha hoştə,
Bıhoştiy boştə bıyə, ha hoştə.
*****
Ha ko beşe riyəsə, ha hoştə,
Pılo bedə kiyəsə, ha hoştə.
Həsıku çəş jəyədə, ha hoştə,
Hıncım bəkaş iyəsə, ha hoştə.
*****
Şəhron bə nav di bedə, ha hoştə,
Diyon kəno hi bedə, ha hoştə.
Dıl bə dıli dətaspəy, ha hoştə,
Orzuşonən i bedə, ha hoştə.
Baladdin Veşo
Lik, Andurma