Həşi beşə Kaspisə, ha hoştə,
Ruj damə şoy taspisə, ha hoştə.
Conım bə yari ğıbon, ha hoştə,
Bome sipyə aspisə, ha hoştə.
*****
Vılım şıdoy bə dıyo, ha hoştə,
Moyon podşo bo vıyo, ha hoştə.
Yariku co be darde, ha hoştə,
Qıyozəbum çəy qıyo, ha hoştə.
*****
Çəşi siyo qıloş hest, ha hoştə,
Dıli həyon miloş hest, ha hoştə.
Qıləyım yar vıjnə mı, ha hoştə,
Əcəb barzə boloş hest, ha hoştə.
*****
Bəxti roysə peqıni, ha hoştə,
Bə eşği bənd eqıni, ha hoştə.
Az bə yari dıl bədom, ha hoştə,
Hərəbaxt bəka mıni, ha hoştə.
*****
Şin daməbəy lol məkə, ha hoştə,
Felon dəbast, yol məkə, ha hoştə.
Az ıştınim, qidi zoə, ha hoştə,
Həni co xıyol məkə, ha hoştə.
*****
Fikım komco latə be, ha hoştə,
Zeranə nun tatə be, ha hoştə.
Ve tınd məkə həsrəti, ha hoştə,
Zilisəş dıl patə be, ha hoştə.
*****
Ro bə çəşim çəsədə, ha hoştə,
Çəşım arsi təsedə, ha hoştə.
Yarım bo bə vindemon, ha hoştə,
Haftə bı sə, bə sədə, ha hoştə.
*****
Qıyozə hur hilisəy, ha hoştə,
Osmoni ranq nilisəy, ha hoştə.
Oməzavzın həsrəti, ha hoştə,
Dılım əçəy zilisəy, ha hoştə.
*****
Roy eməğand bə tanqi, ha hoştə,
Orzu mahaşt bə lanqi, ha hoştə.
Qıləy çəşruşni bıdə, ha hoştə,
Vəyə bəbe bı manqi, ha hoştə.
*****
Ha ru, vılım çune şe?, ha hoştə,
Nışte, bə dim benışe.., ha hoştə.
Kenəy çəşbəro mandəm, ha hoştə,
Yar bəçəy yod dənışe? Ha hoştə.
*****