Əlolə Səkinə kie?
Sındı-siə sinə kie?
Həyə mını pidəbu
Tono ə kinə kie?
***
Əlolə ov okırie,
Bo moy mahol dəkırie
Əhsən bə jenı-şuə
Zoə lole, kinə kore.
***
Əlolə bəşe bo je,
Vıl bəkaşte, teğ beəje,
Neçiəvon təyli bome-
Bə bandi tanə bəje.
***
Əlolə yolə ğəje,
Çətin bə dast peəmije.
Bədə ruji çokə dust
Boçi tonə zu bəje?
***
Əlolə dastı dəje,
Ləvo bə ləjim dəje?
Mehmoni bəvinde kaxt-
Kəybə-pencon ğoym bəje.
***
Əlolə darde, doje-
Ki duston arə bəje.
Yo bə yo çəş peğande
Muəxolon dəje-dəje.
***
Əlolə vıl ki beje-
Bılbıli dıl bədəje.
Məhə nomerdi nuni-
Ruji bəştı sə bəje.
***
Əlolə ğəce çanqe,
Ruj de şəvi bə canqe.
Manq heste ruji to ni.
Ruj heste həzo manqe.
***
Əlolə Məkkə yole,
Məyjusə məkə yole.
Tı çımıniş, az ıştı-
Ço xiyol məkə, yole (ey yar)
***
Əlolə xoş əhvole,
Yo dimədə syo xole.
Asbədə çı bəqi zoəy,
Sa sə əsqəri yole.
***
Əlolə kinə vıle,
Boğo bemə sınbıle.
Az qıle zoə pidəme-
Vılə boğçon bılbıle.
***
Əlolə yole-yole,
Im çı xosə mahole!
Yo dıqlə sinə arə
Əcəb hıtə məcole.
Bayrami Allahverdi
Masalli, Mahmudavar
