Əlolə bə çık-çıke!
Nilə do rə bəçəke.
Bədə ruji hovə çok,
Xəşə ruji jen çoke!
***
Əlolə bə həvəse,
Bomı jimon əbəse.
Rost kəşım bə yo ğıbon,
Çəp kəşım bəmı vəse!
***
Əlolə çiç bəparse?
Əğıl pıku bətarse.
Bəvinde pı omedə,
Qa bəpoy, qa bəfırse.
***
Əlolə bəmı vəse,
Dıl ıştıku şoğ bəse!
Iştı dimi vindəkəs
Bə ovşumi niədyəse.
***
Əlolə noğo naxşe,
Yo çımı Xıdo baxşe.
Boyli ome- ni baxşe,
Yo ome, çı rə baxşe?
***
Əlolə əcəb naxşe,
Poz ome,vıli şax şe,
Bəmı təylə vədə doy,
Bə co kəsi dıl baxşe.
***
Əlolə ovşum beşe,
Amım bə soğnə dəşe,
Edyəsim, votim: həlbət
Çımı pəvəndi kəşe!
***
Əlolə səm dəpuşe,
Kiəpotəsə du peşe.
Həmmə yoon durust bin,
Çımıki bə du beşe.
***
Əlolə bə çəş dəşe,
Yo bəştə yo kəş dəşe!
Nənə boştə balə ro
Bə həzo otəş dəşe.
***
Əlolə Xıdo baxşe,
Ə çımı dıli naxş,şe.
Yo toniku qınokəm-
Çətin mıni bəbaxşe.
***
Əlolə bino be,şe,
Bə dınyo kəno beşe.
Bəfoynə yo bındıne,
Bebəfo bənoy bəşe.
Bayrami, Allahverdi
Masalli, Mahmudavar
