Kosibi hardış əbıni, dardış bəbe,
Tovsonədə kəy dılədə sardış bəbe.
Dim əsırni, ranqış hejo zardış bəbe.
Dınyo dardon jıqo bızın bəyo mandə,
— Kəxobi zoə, nənə tınış boçi zandə?
Maştə-maştə ruj obedə, Həşi beşdə,
Ə kambəxtən qədə-qədə səpo əşdə.
İ şələ dard, i şələ ğəm əçəy çəşdə.
Bənə mujnə ji zəmini hejo kandə,
— Kəxobi zoə, nənə tınış boçi zandə?
Zəmin əçəy, nati puli co kəs hardə.
Bə əğili pul doydəni, sərboz bardə!
Bardə əyo şıkəst kardə, şəhid kardə;
Əçəy həxi harde-harde bəyo handə!
— Kəxobi zoə, nənə tınış boçi zandə?
Diyo çəmə! Kulmə, kırı vindənimon,
Çəşipuri ğazən sutey zındənimon.
Con doydəmon halonsə , oqındənimon
Tarə olətış hışk bedə əçəy tandə;
— Kəxobi zoə, nənə tınış boçi zandə?
Çi laylaye jəşe botı ıştı dodo?
Kə-bə ğəbe, jimon qiləy yolə çodo.
Çoknə bəbe çəmə oxo, şinə Xıdo?
Bımard-bırəx, ebətoveş jıqo çandə?
— Kəxobi zoə, nənə tınış boçi zandə?
Masalli, Miyonku
SADIX KƏRBƏLAYİ
