Aprel ayının 2-i səhər saat 09:47-də Abşeron Rayon Mərkəzi Xəstəxanasına üz tutdum. Sıra nömrəsini aldığım zaman qarşıma çıxan mənzərə məni heyrətləndirdi – mənim növbə nömrəm C1539 idi. Bu, xəstəxanada mövcud olan sıxlığın və təşkilati problemlərin bariz göstəricisidir.
Abşeron Rayon Mərkəzi Xəstəxanasının tabeliyində üç kiçik poliklinika var. Sual yaranır: Niyə bu qədər xəstənin hamısı bir xəstəxanaya yönləndirilir? Xəstələrin bir qismini həmin poliklinikalara bölmək mümkündür. Orada yaşlılar, əməliyyat keçirmiş xəstələr, yeriməkdə çətinlik çəkənlər, şəhid və qazi ailələri, uşaqlar və iş adamları da vardı. Onların hamısının eyni məkanda xidmət almağa məcbur edilməsi həm vətəndaşlara, həm də tibb işçilərinə əlavə çətinliklər yaradır.
Xəstəxananın yeni direktoru Səkinə Sadıxovadır. Düşünürəm ki, ona müəyyən təkliflər versək, həm pasiyentlərə, həm də tibb personalına böyük kömək etmiş olarıq. Xidmət sahəsindəki problemləri həll etmək üçün bəzi tədbirlər həyata keçirilməlidir.
Xəstəxanada qeydiyyat şöbəsində 12 nəfər işləyirdi. Buradan xəstələr həkimlərə yönləndirilirdi. Bununla belə, bu qədər insanın eyni anda bir məkanda toplaşması həm fiziki şərait baxımından, həm də resurs israfı baxımından problemlərə səbəb olur. Böyük bir sahənin qızdırılması böyük enerji sərfiyyatına və maliyyə itkisinə səbəb ola bilər. Bu xidmət daha effektiv şəkildə təşkil edilə bilər.
Təsadüfən, xəstəxananın mətbuat katibi Gülnar Seyidova ilə də qarşılaşdım. O, başqa bir vətəndaşın suallarına cavab verirdi. Onun mətbuat nümayəndəsi olduğunu bildikdən sonra öz iradlarımı da bildirdim. O da bu problemlərin mövcud olduğunu təsdiqlədi və müəyyən dəyişikliklərin lazım gəldiyini qəbul etdi.
Abşeron Rayon Mərkəzi Xəstəxanasının tabeliyində olan Xırdalan şəhərində, keçmiş doğum evi kimi fəaliyyət göstərən tibb məntəqəsində artıq iki gündür ki, sistem işləmir. Halbuki sistem işləsə, orada da bir çox xəstələrin qəbulu təşkil edilə bilər. Digər poliklinika isə Masazır kəndində yerləşir və iki mərtəbəli inzibati binadan ibarətdir. Əgər bu məntəqələrə UZİ aparatları və digər tibbi xidmətlər əlavə edilsə, xəstələrin böyük hissəsi Abşeron Rayon Mərkəzi Xəstəxanasına getməyə məcbur qalmazdı.
Xırdalan şəhərində bir poliklinika da mövcuddur. Belə olan halda Abşeron rayon sakinləri niyə bu qədər çətinliklə tibbi müayinədən keçməlidir? Niyə aidiyyəti qurumlar xəstələrin düzgün yönləndirilməsini təmin etmirlər?
Orta təbəqəli vətəndaşlar sığortadan yararlanmaq istəyirlər, lakin bu prosesdə çox problemlərlə üzləşirlər. Nəticədə, xəstəxanada əsəbi və narahat bir mühit yaranır.
Abşeron Rayon Mərkəzi Xəstəxanası Sumqayıt yolunun üzərində yerləşir. Bəs gələn vətəndaşlar oraya necə çatmalıdır? Mən Masazırda qalıram və xəstəxanaya getmək üçün marşrut xətləri əlverişli deyil. Geri qayıtmaq üçün taksidən istifadə etməli oldum. Bəs digər vətəndaşlar nə etməlidir? Bu problemi həll etmək üçün xəstəxanaya marşrut xətlərinin yönləndirilməsi və ictimai nəqliyyatın optimallaşdırılması vacibdir.
Ümumilikdə tibbi xidmətdən razı qaldım və orada çalışan tibb personalına heç bir iradım yoxdur. Onu da qeyd etməyi özümə borc bilirəm şikəyət xidmətinin rəisi Nərgiz Cəmilzadəyə yaxınlaşıb növbəmlə əlaqədar iradımı bildirdim. Onlar da həqiqətən bacardıqları qədər vətəndaşlara xidmət edirlər. Ancaq unutmamalıyıq ki, onlar robot deyil. Onların iş şəraitinin yaxşılaşdırılması və stres altında olmamaları təmin edilməlidir. Növbələrin düzgün idarə edilməməsi, həm vətəndaşların, həm də tibb personalının əsəbi olmasına səbəb olur. Ordakı növbələrdə elə bir vəziyyət yaranır ki, adamın ürəyi partlamağa qalır. Bu isə həm vətəndaşlar, həm də tibb işçiləri üçün dözülməz bir mühit yaradır.
Bu problemlərin tezliklə həll olunması, həm xəstələrin rahat tibbi xidmət almasını, həm də həkim və digər tibbi heyətin daha effektiv işləməsini təmin edəcəkdir.
Hörmətlə,”Dodo” qəzetinin baş redaktoru
İradə Məlikova.