Əlolə ğəmon bəmı,
Ruşt bıdo imom bəmı.
Bə çı ruj mandim, Xıdo,
Sıredə ımən bəmı!
***
Əlolə məhıt bemı,
Bebəfo məvot bəmı.
Az ıştınim, tı çımı,
Daynə məğand dumə mı!
***
Əlolə doy ğələmı,
Kərəm tıniş, Lələ mı,
Hicroni tındətiku-
Dəvastəme şələ mı!
***
Əlolə boni çımı,
İqləlim, bo ni çımı!
Tınım ve pidə, kinə,
Iştı xəbə ni çımı!
***
Əlolə honi çımı,
Dard-ğəmi qoni çımı.
Tı mını ve pidəbən,
Hiç xəbəm bıəni çımı.
***
Əlolə kəşe çımı,
Yo ro bə çəşe çımı.
Çı Tolışi tərlonim-
Sonə se pişəy çımı!
***
Əlolə bande bəmı,
Təponən bande bomı.
Məhlədə kinə pime-
Təylə nom mande bomı!
***
Əlolə okə bomı,
Dard-ğəmon tokə bomı,
Mardim noz kəşe-kəşe,
Ənə noz məkə bomı!
***
Əlolə syo xaçonı,
Sinə səpe dəçını,
Yo şamamə perosnı,
Pəvəndi əy bıçını!
***
Əlolə Mələk həsı,
Bə vəyu qərək həsı,
Zoə ki bə kə omedə,
Vəyusə zirək həsı.
***
Əlolə şo nim betı,
Mavji besonim betı.
Tiy bıqıno, xun emo,
İyən əmolnim betı.
Bayrami Allahverdi
Masalli, Mahmudavar