Əlolə soyə kinə,
Mandə bə xıyə kinə.
Tı çımı bo pəvəndi,
Az ıştı iyə, kinə.
***
Əlolə dəbastə bıə,
Ru navədə bastə bıə.
Oj bəbe i ruj, məbəm,
Fələki dəvastə bə!
***
Əlolə bılındə zoə,
Ğıron kəşəbındə zoə.
Ğıron detı bızıno,
Bəmı səş peğandə zoə.
***
Əlolə nalbənd, ha zoə
Şinə nəbot, ğənd ha zoə.
Boy bətı ğəssəm bəhəm,
Bıbi bəmı bənd, ha zoə.
***
Əlolə bandi japə,
Kinon sədə xol-çipə.
Zoon dumo edyəsdən
Bənə danqəzə sıpə.
***
Əlolə çı diy arə,
Ruyən bəbe duy arə.
Morəjə çok bəbe, çok
Əbıni çı du yarə!
***
Əloləm bo Çinarə
Ğıbon bə sinə arə.
Yo sırə məlhəm bəbe,
Bə çımı sinə yarə.
***
Əlolə bandə vırə,
Yo demı mandə vırə.
Sinəm nışonəy, bə yo
Tiykəmon ğandə vırə.
***
Əloləm bo Simarə,
Bebəfoy, nime arə.
Əy çımıku bıparsoş,
Edyəs bə sinəm arə.
***
Əlolə az avarə,
Bə dard dəşim beçarə.
Çımı dardi bə kinə
Xəbə bıdən jenarə.
***
Əlolə çəmə vırə,
Ovşumi pemə vırə,
Çəşə arsım otəş be,
Sutışe emə vırə.
Bayrami, Allahverdi
Masalli, Mamudavar