Əlolə təvə vırə.
Həşi dətovə vırə.
Həzo fərzəndı bıbu,
Ədəni nəvə vırə!
***
Əlolə qəte mərə,
Bə tələ dəşe morə.
Piəme bə xəlvət dənəm,
Doy bəmı çəşəmurə!
***
Əlolə qamoə vırə,
Ğal bəbe həmoə vırə.
Hiçki ədəni,boyli,
Hovə vırə,moə vırə.
***
Əlolə bıqət vəsə,
Bınəmon lıv lıvisə.
Şeğ bıbəmon-eməmon
Çı livə-bə livəsə.
***
Əlolə bəsə tiysə,
Səm bədəje dustisə.
Xıdo, mıni rə bıkışt,
Sipi nıbu dusti sə.
***
Əlolə qızqinə sə,
Şərt bınə kinə nısə.
Bırəs, mıni kıştedən,
Kavyə çəşə kinəsə!
***
Əlolə nıştim ronsə,
Mandim bəsə quşonsə.
Yo bəste kətton bo şəy,
Dute çımı çəşonsə!
***
Əlolə sınbılisə,
Bılbıl nışte xolisə.
Pişe qəvi bəhando.
Teğ eşe çəy dılisə.
***
Əlolə ha Xonnisə,
Çı ko heste honisə?
Dəsmoli bəste, bəşe-
Xaçinə zoə bə isə!
***
Əlolə ko koonsə,
Kafte nıştə doonsə.
Ov ekə, çodo bıjən,
Dədəm mandə roonsə.
***
Əlolə doy bəşonsə,
Yo bə çəşim kəşonsə,
Çəşruşni bıdəkəsi,
Vırəş heste çəşonsə!
Bayrami Allahverdi
Masalli, Mahmudavar
