Əlolə con dəjedə,
Dınyo mıni ojedə.
Bəy dəsınd, dəşi bə kə,
Çımı bədə rujədə.
***
Əlolə voə-voş voydə,
Bando vovaz omeydə.
Yətimi çəşon bəzneyn-
Çəşə ars çı doğ noydə!
***
Əloləm bə Mədəğə,
Dənoy bə con dəğdəğə.
İ kərə dimı sıre-
Coni bədom sədəğə.
***
Əlolə xosə əğə,
Məkə dımı ləğləğə.
Mətars cını-pəyniku-
Ha ruj bekə sədəğə.
***
Əlolə çımı əğə,
Dədə dasti kırtəğə.
Avşum bıbum, pebuşum
Bəştı bə ğəmə nığə!
***
Əlolə sınbıl okə,
Vıli tono vıl okə,
Bə yo az ğıbon bışum,
Damə bıkə, dıl okə.
***
Əlolə oqard bə kə,
Bışi,boy, ro qard bıkə.
Nə dardım heste, nə ğəm-
Tıniş mıni zard bıkə.
***
Əlolə lovə bıkə,
Dıli sıə tovə bıkə.
Bışi, çımı zıvono
Bə kinə lovə bıkə.
***
Əlolə bə bi diəkə,
Bəştə to-bobi diəkə.
Dimədə dust votəyon
Peşədə ğəlbi diəkə.
***
Əlolə şe dumə kə,
Şin bıvot, şin daməkə.
Kinə bətı ədənin,
Çəşə arsi əməkə!
***
Əlolə bəmı diəkə,
Çı vəyuku dodəkə!
Bə vəyu rıki məqət,
Bəvite bə dədə kə!
Bayrami Allahverdi
Masalli, Mahmudavar
